Նոր համագործակցություն
Հարգարժան ընթերցող, տեղեկացնում ենք, որ Junior Football TV-ն և Վայոց Ձորը ներկայացնող «Նորավանք» սպորտային ակումբը կնքել են պայմանագիր՝ սկսելով համագործակցություն: «Նորավանքն» իր ֆուտբոլային հանդիպումների նկարահանման և ուղիղ հեռարձակման աշխատանքները վստահել է Junir Football TV-ի թիմին, ինչն ուրախացնող և պարտավորեցնող է:
Շնորհակալություն հայտնելով «Նորավանք» սպորտային ակումբին՝ մաղթում ենք նրանց գեղեցիկ ֆուտբոլային հանդիպումներ և բազում հաղթանակներ:
«Նորավանք» սպորտային ակումբի ֆուտբոլային հանդիպումներին կարող եք հետևել ԱՅՍ հղումով:
«Նորավանք» սպորտային ակումբի պատմությանը կարող եք ծանոթանալ ԱՅՍ հղումով:
«Նորավանք» սպորտային ակումբի հիմնադիր Սիմոն և Լինդա Բալյանների ընտանիքի նպատակն է բարելավել Հայաստանի Հանրապետության այն մարզերի սոցիալ-տնտեսական վիճակը, որոնք ունեն դրա կարիքը։ Ակումբը Վայոց ձորի մարզում կզարգացնի ակումբային ֆուտբոլը՝ հետագայում ընդլայնվելով այլ մարզաձևերում:
Ակումբի առաքելությունը մարզման նոր մեթոդաբանության ներդնումն է, որը միտված է լինելու զարգացնել թիմային ոգին, փոխադարձ վստահությունը, հարգանքն ու համայնքին ծառայելու կարողությունը։ Ակումբն անվանվել է Նորավանք մարզի միջնադարյան հոյակերտ հուշարձաններից մեկի՝ Նորավանք վանական համալիրի անվամբ, որը գտնվում է Վայոց ձորի մարզի Արենի համայնքից 12 կմ հարավ-արևմուտք։ Ակումբի պատկերանշանում (լոգոտիպում) պատկերված են վանական համալիրի արևմտյան մուտքի՝ երկու կողմից պատի հետ վեր բարձրացող նեղ պահունակային աստիճանները, որոնք խորհրդանշում են ակումբի առաջընթացն ու քայլ առ քայլ զարգացումը։
Ակումբը գրասենյակներ ունի Եղեգնաձորում և Երևանում, ինչպես նաև՝ Ֆլորիդայի Բոկա Ռատոն քաղաքում: Ակումբի նպատակներից է նաև մարզական ամառային ճամբարներում սփյուռքահայերի ներգրավումը։ Մասնակիցները ճամբարների ընթացքում կզարգացնեն ոչ միայն իրենց հմտությունները՝ ունենալով պրոֆեսիոնալ մարզիչներ, այլև կունենան հնարավորություն ավելի խորը ծանոթանալու իրենց մշակութային ժառանգություններին։