Հայտարարություն Մ-12 և ցածր տարիքային թիմերի համար
Հայտարարություն
Հայաստանի ֆուտբոլի ֆեդերացիայի կողմից կազմակերպվող
Մ-12 և ցածր տարիքային առաջնություններին մասնակցող թիմերի համար
Տեղեկացնում ենք, որ 01.01.2026թ.-ից սկսած Junior Football TV-ն Մ-12Մ, Մ-11Մ, Մ-10Մ, Մ-9Մ և Մ-8Մ տարիքային խմբերի առաջնությունների բոլոր մեդիա-նյութերը ներկայացնելու է առանց խաղային հաշիվների։
2025-2026թթ. ՀՖՖ Մանկապատանեկան ֆուտբոլի մրցումների կանոնակարգի «Գլուխ 2-ի Հոդված 11-ի 11.20-11.22 կետերի» համաձայն. «Մ-12Մ, Մ-11Մ, Մ-10Մ, Մ-9Մ և Մ-8Մ տարիքային խմբերի առաջնությունների մասնակից թիմերի խաղերը կրում են ընկերական բնույթ, երեխաները խաղում են զվարճանքի համար, և ՀՖՖ-ն չի կազմում մրցաշարային աղյուսակ, հետևաբար՝ տվյալ տարիքային առաջնությունների խաղերում չի գրանցում խփած և բաց թողած գնդակների տարբերությունը»։
Junior Football TV-ն Հայաստանի ֆուտբոլի ֆեդերացիայից ստացել է իրազեկում՝ համաձայն որի արգելվում է Մ-12 և ցածր տարիքային առաջնություններին մասնակցող թիմերի խաղերը ներկայացնել խաղային հաշվով։ Պատճառը պատանի ֆուտբոլիստների վրա հոգեբանական բացասական ազդեցությունն է։
Ելնելով վերոգրյալից և պատանեկան ֆուտբոլի ոլորտի՝ սեփական վերլուծության ընդհանուր պատկերից՝ Junior Football TV-ն դիմում է ծնողական համայնքին.
- Հարգեք մրցումների անցկացման համար սահմանված կանոնակարգը՝ դադարեցրեք խաղային հաշվի հետ կապված բոլոր քննարկումները։
- Առաջնությունների խաղերի ընթացքում զերծ մնացեք դաշտից դուրս տարբեր որակում-պիտակավորումներից՝ ուղղված մարզիչներին, մրցավարներին կամ մրցակից թիմերին։
- Ապահովեք ընկերական մթնոլորտ երկու թիմերի պատանիների համար։
Ցավով ենք արձանագրում, որ հաճախ ականատեսն ենք լինում ծնողական համայնքի կողմից դրսևորած անառողջ, ագրեսիվ դրսևորումների և զգացմունքային անհարկի պոռթկումների, ինչը բացասաբար է ազդում ֆուտբոլային հանդիպման մասնակից երկու թիմերի պատանիների վրա հավասարապես։
Եթե ուզում եք ունենալ հայկական զարգացած ֆուտբոլ՝ որտեղ իր դերն ու դիրքը կունենա նաև ձեր երեխան, զերծ մնացեք վերոնշյալ մոտեցումներից, պահվածքից։
Junior Football TV