Լարա Ղազանչյան – մոնրեալահայ 15-ամյա ֆուտբոլիստը
Կանադայում գործող հայկական noranor.ca կայքն անդրադարձել է մոնրեալահայ ֆուտբոլիստ 15-ամյա Լարա Ղազանչյանին:
Լարան ուսանել է Մոնրեալի Սուրբ Հակոբ Ազգային վարժարանում՝ մինչև 6-րդ դասարան: Այժմ կրթությունը շարունակում է Մոնրեալի քոլեջում: Նա այստեղ հնարավորություն ունի ուսումնառությունը համատեղել մարզումների հետ: Աղջնակը ֆուտբոլով զբաղվում է արդեն 11 տարի:
Մոր՝ Ռաշել Խալաֆյանի խոսքով Լարան ֆուտբոլով սկսել է զբաղվել 4 տարեկանից՝ հոր հորդորով: Ֆուտբոլային ընդունակություններն իրենց բացահայտել են հենց առաջին իսկ քայլերից:
«Աղջիկների համար հիմա դժվար է ֆուտբոլով զբաղվելը, քանի որ աղջիկները շատացել են և բոլորն էլ ձգտում են լավ խաղ ցուցադրել, երևալ: Երբ փոքր էի քիչ թվով աղջիկներ էին զբաղվում ֆուտբոլով, հեշտ էր ավելի: Ազատ ժամանակ գրեթե չեմ ունենում: Ամբողջ ժամանակս տրամադրում եմ ուսուցմանը և ֆուտբոլին: Եթե ազատ ժամանակ էլ մնում է, այն հատկացնում եմ ընկերներիս: Միշտ երազել եմ խաղալ Կանադայի թիմի կազմում», – ասում է Լարան:
Լարայի երազանքն իրականացավ. ստացավ Կանադայի թիմի կազմում խաղալու հրավեր, և սպորտին հատկացվող ժամանակն ու ջանքերը կրկնապատկվեցին:
«Մեկ տարով մեծ աղջիկների հետ եմ խաղում, և չպետք է բավարարվեմ եղածով: Ավելի շատ պետք է աշխատեմ ինձ վրա, որպեսզի մնամ լավագույնների շարքում: Շատ եմ սիրում Հենրիխ Մխիթարյանին, հետևում եմ նրա խաղերին, ձգտում եմ նրա նման լավ ֆուտբոլիստ դառնալ: Հպարտ եմ, որ հայ եմ. Հայաստանը միշտ սրտումս է», – ասում է Լարան:
Նա առանձնակի ոգևորությամբ է հիշում ունեցած հաղթանակներից երկուսը. 1. 2017թ.-ի ամռանը Չինաստանում կայացած ֆուտբոլային հանդիպումներին Կանադան մրցել է ԱՄՆ-ի, Չինաստանի և Ճապոնիայի դեմ: 2. 2016թ.-ի ամռանը Ֆլորիդայում կայացած ֆուտբոլային հանդիպումների արդյունքում՝ 2-րդ տեղ (արծաթե մեդալակիր):
Լարան արդեն իսկ ամերիկյան համալսարաններից առաջարկներ է ստանում իրենց մոտ ուսանելու համար: Մտորում են դրանց շուրջ, և մտադիր են լավագույն հաստատություններից մեկն ընտրել, որպեսզի Լարան լինի ոչ միայն տաղանդավոր, այլև ուսյալ ու կիրթ մարզիկ:
Ամբողջական հոդվածն ԱՅՍՏԵՂ
ՀԳ. juniorfootball.am-ն էլ մաղթում է մեր հայազգի մարզիկին հաջողություններ թե ուսման մեջ, և թե սպորտի ոլորտում: