Նորույթ ֆուտբոլային համացանցում
Հարգարժան ընթերցող.
2016թ. սեպտեմբերի 1-ին համացանցում գործարկվեց հայկական ֆուտբոլային պատմության մեջ 1-ին մանկապատանեկան ֆուտբոլային juniorfootball.am կայքը: 3 տարի անց այն դեռևս մնում է որպես միակն այս ոլորտում:
Տարբեր առիթներով նշել ենք, որ մեր թիմն արդեն 7-րդ տարին է, ինչ նկարահանումներ է իրականացնում ՀՀ ֆուտբոլի մանկապատանեկան առաջնության շրջանակներում (այս էջի գլխավոր հատվածում տեղադրված է մեր կողմից նկարահանված և համացանցում տեղադրված 1-ին տեսագրությունը. Փյունիկ-2-01 vs Բանանց-2-01): Մեր գործունեությունն ի սկզբանե նպատակաուղղված է խթանելու մեդիա ոլորտում պատանեկան ֆուտբոլի ներկայացվածությանը: Արել ենք առավելագույնը, որպեսզի պատանեկան ֆուտբոլը ներկայանա պրոֆեսիոնալ ֆուտբոլի չափանիշներին համապատասխան՝ դրանով իսկ ստեղծելով մրցակցություն ոլորտում գործող մեր մյուս գործընկերների համար: Այս քայլին գնացել ենք՝ գիտակցելով, որ հենց մրցակցությունն է բերելու մեդիա-նյութերի որակի բարձրացմանը, առավել մատչելի պայմանների ստեղծմանն ու թվային և տեխնիկական նորագույն գործիքների կիրառմանը: Այս առումով ունենք հաջողություններ: Դրա վառ ապացույցներից մեկն էլ մեր որոշ գործընկերների կողմից որպես juniorfootball.am -ի աշխատակից ներկայանալն էր, ինչը համարում ենք անթույլատրելի և մեր բարի համբավի շահարկում: Ինչևէ, սա էլ ստեղծած մրցակցության և մեր կատարած աշխատանքի բարձր գնահատման մի յուրօրինակ դրսևորում է:
Այս ճանապարհը միայն մենք չէ, որ անցել ենք: Մեզ միացել են ֆուտբոլային տարբեր ակումբներ, մարզչական և մրցավարական համայնքները, պատանի ֆուտբոլիստները և նրանց ծնողները: Մեր աշխատանքը բարձրակարգ է գնահատվում Հայաստանի ֆուտբոլի ֆեդերացիայի կողմից, ինչպես նաև՝ ոլորտում գործող մասնավոր ընկերությունների ֆուտբոլային մասնագետների կողմից:
Սա ուրախացնող է և պարտավորեցնող: Մեր թիմը շնորհակալություն է հայտնում վերոնշյալ բոլոր կառույցներին և անձանց, բոլոր նրանց, ովքեր իրենց աջակցությամբ և խորհուրդներով եղել և շարունակում են մնալ մեր կողքին:
Այսօր juniorfootball.am -ը ֆուտբոլասեր հանրությանն է ներկայացնում մի ենթահարթակ, որտեղ հասանելի կլինեն հայկական ֆուտբոլին վերաբերող բոլոր տեսանյութերը: tv.juniorfootball.am ենթակայքը մշակվել է՝ նպատակ ունենալով մեկտեղել բոլոր տեսանյութերը՝ ավելորդ փնտրտուքներից զերծ պահելու, և ավելի հարմարավետ դիտումներ ապահովելու համար:
tv.juniorfootball.am -ը ևս մի քայլ է, որն արել ենք՝ հավատալով, որ այն նույնպես կընդունվի և սիրված կլինի քո կողմից: Ընդունիր սա որպես նվեր juniorfootball.am -ի 3-ամյակի կապակցությամբ (քիչ ուշացումով ենք ներկայացնում՝ տեխնիկական որոշ խնդիրների պատճառով):
Այսպես, փոքրիկ քայլերով շարժվում ենք առաջ: Առջևում նոր և հաճելի ծրագրեր ունենք, որոնց երկար սպասեցնել չենք տա:
Շնորհակալություն, որ մեզ հետ ես. դու էլ մեր թիմի մի մասնիկ ես: Մեզ համախմբողը ՖՈՒՏԲՈԼՆ Է: Պատանեկանից է սկսվում պրոֆեսիոնալ ֆուտբոլը:
Բոլոր պատանի ֆուտբոլիստներին մաղթում ենք հաղթական բարձունքներ, որ մեր դրոշը բարձր ծածանվի: